標題:
當生命只剩三個月
[打印本頁]
作者:
kimwong3252000
時間:
2011-6-19 12:10
標題:
當生命只剩三個月
感謝巴打"我不是樓主"
http://forum8.hkgolden.com/view.aspx?message=3026461
==================================================
我係一個平凡人, 大學畢業後做左幾年野, 曾經有女朋友, 最後冇埋。
朋友唔多, 係一個典型打工仔加宅男。我以為我一生都係咁平凡咁渡過。
直到一日返工, 我係地鐵站暈倒, 醒返已經係醫院。
開頭我唔會覺得自己有D咩問題, 只係諗會唔會係自己尋晚打機打得太夜所以先咁樣。
當我係病房等醫生攞報告入黎俾我ge時候, 我見到我阿爸阿媽兩隻眼紅晒, 我同佢地講唔洗擔心, 我D咁平凡ge 人係唔會突然有D咩特別ge 事發生係我身上ge。
「急性白血病」醫生若無其事咁同我講。
「什麼!!!」我聽完佢講之後ge 反應。
醫生: 係你ge 血液報告顯示, 你患有急性白血病, 亦即血癌。
我當時連咩係血癌都唔知, 一味只係係度大喊, 最後聽到醫生講ge 說話係:
「以你ge情況, 化療已經幫唔到你, 你身體會日漸衰弱, 先生, 我想你大概還有3個月命。」
作者:
kimwong3252000
時間:
2011-6-19 12:11
家人篇
當一個人接到呢D突如其來的打擊, 最初會否定, 唔相信。
於是我去搵左好多其他醫院, 化驗所, 得出黎ge 結果係一樣。
第二個反應會係逃避
所以我唔理醫生建議返醫院覆診, 當正常生活咁返工放工左兩個星期
直到終於有一次係office 暈低左。
第三個反應係接受
我開始上網搵呢個病的資料, 知道自己將會出現D咩病徵, 於是我聯絡自己個保險經紀, 將呢個消息話俾佢聽。
佢係我一個中學女同學, 畢業後幾年佢轉左做保險, 我係佢第一個中學同學ge 客。
我好冷靜咁同佢講左我ge 事, 佢反應比我大好多, 不斷係度喊, 掉返轉頭要我叫佢唔好咁傷心。我叫佢要幫我保守呢個秘密, 唔好同任何人講, 同時要將我份保險金確確實實送到我父母手中。佢應承左我, 我亦都放下我心頭一塊大石。
最後, 亦都係最難ge 一步, 我叫齊晒我父母, 家姐同佢男友返屋企
我將我自己身體情況同佢地講清講楚。媽媽同家姐聽到之後喊到收唔到聲。
我見我老豆都係強忍住淚水。
我過去攬住我媽同家姐: 我地唔好再浪費時間傷心落去啦, 我剩返ge 時間唔多, 唔想再用係喊或者怨天猶人上面, 我想留返黎同自己最關心, 自己最親ge人一齊過。
我同媽講: 媽, 自從我讀大學, 返工後, 成日都唔返到屋企食飯, 我好想每晚都食到住家飯, 唔知得唔得呢?
媽: 得, 只要你返黎, 我日日都煮俾你食…….
我掉轉頭同阿爸, 家姐, 未來姐夫講: 如果你地可以都盡量返屋企食飯丫, 都唔會好長時間要你地咁樣就我, 最多都係2個月到…..
家姐: 細佬, 我地一定會晚晚返黎食飯, 一家人冇計邊個就邊個, 以前我未搬出去, 你仲讀緊中學我地晚晚都係等老豆返黎就開枱食飯ga la, 總之我地一家人一齊, 就有粥食粥, 有飯食飯。
我終於忍唔住, 大家喊住口咁食呢餐飯。
呢餐係我一世都會記住ge 晚餐。
作者:
kimwong3252000
時間:
2011-6-19 12:11
知己篇
回想起我中學時期, 朋友唔多, 打波食飯, 抄功課留堂, 暗戀失戀, 樣樣事情都係只有同呢個兄弟講, 呀華
佢而家幾好, 係我地屋企附近條屋村商場入面同佢老婆開左檔糖水鋪。
佢成日講到自己幾多女想溝佢, 其實無料扮四條。佢老婆係佢初戀情人, 仲係由中學開始拍拖到結婚。佢老婆叫小唯, 係我地form ge 校花。
當時真係有好多狗公追佢ga, 呀華條友仔, 又唔敢去馬, 成日同我講點樣點樣鍾意人。
有一次, 係陸運會上面, 呀華正係度跑緊社際4 x 400接力, 而小唯亦都係同佢一個社, 仲係社啦啦隊隊長。
我見小唯係看台上面望住跑最後一棒ge 呀華, 我見佢眼神入面充滿關心同緊張, 唔通小唯對呀華有野…….
於是我幾大就幾大, 燒賣就燒賣, 攞起左個打氣用ge 大聲公:
「4A班XX唯, 而家跑緊ge 4E班XX華好鐘意你, 請你大聲D同佢打氣!」
全部人都聽到我講咩, 然後全部人一陣大笑, 連跑緊ge 呀華都聽到, 成面都紅晒係跑道上好大聲咁屌我: 死仔, 收聲啦!!!
小唯同呀華就係咁, 係陸運會後搞ge 打邊爐上面成為我地玩ge 對象, 不過全靠我, 佢先攞到人電話。
每次諗返起呢件事, 我就覺得係我一生人做得最啱ge 一件事。
呀華畢左業之後, 就幫佢老豆夜晚開車仔檔賣糖水, 而小唯差唔多晚晚都黎陪呀華收檔, 之後佢地結左婚, 兩家人仲出錢等佢地開鋪。
我知道自己有事後, 每晚同屋企人食完飯, 就會落黎呀華鋪頭食碗糖水
呀華次次忙完都會坐低同我吹下水, 講返下以前中學生活點滴。
我: 小唯個肚都咁大, 你叫佢唔好再出黎鋪頭啦, 操身大細
華: 我叫左佢ga la, 不過佢話以前拍拖到而家, 佢都係晚晚等我收工, 佢自己一個係屋企會唔慣wo
我: 預產期仲有幾多個月?
華: 仲有4個月…….
我: 唉, 就差小小, 我就可以睇到你地個仔出世。
華: ………醫生點講……..真係冇……….
我: 唔好講D衰野, 今晚有D凍, 我早D返上去
華: 嗯, 聽晚見…….
我企起身, 離開之際, 好似聽到背後傳黎呀華ge 啜泣聲, 我冇停低, 加快腳步離開
因為我唔想呀華, 小唯睇到我軟弱ge 一面
作者:
kimwong3252000
時間:
2011-6-19 12:11
工作篇
自從上次係公司暈倒之後, 我身體ge 情況已經唔可以再呃人。
我係呢間公司做左4年, 由大學畢業做到而家。
呢度老闆同同事都好好, 大家係呢間小公司入面相處好好, 真係好似一家人一樣。
如果佢地從來都對我好差, 我今日離開就唔會咁唔捨得。
由暈低當日, 之後返工我已經將自己身體情況同老闆, 同事講, 當然佢地唔相信係真, 不過, 真相往往係絕望。
今日係我last day, 成班同事下晝同我飲茶送行。
其實大家飲茶期間好靜, 因為都唔知應該講咩。
「大家唔好咁靜啦, 我仲未死wo, 有仲要食飯飲水ga」我故意講笑想令氣氛輕鬆。
佢地就話大吉利是, 叫我放個假, 休息一下, 醫好個病再返黎搵佢地飲茶。
食完lunch 後, 我返自己個位開始執野, 記得4年前自己仲係個新人, 咩都唔識, 要人帶要人教。到自己開始適應, 身邊ge 同事就一個一個離開, 一個一個新人入黎。由以前要人教, 到自己開始要教人。
工作時間同責任愈來愈多, 人開始只變成一部返工放工的機器。
「人生存係為左咩? 人的一生唔通就係要咁忙忙碌碌中渡過?」我不禁問自己。
「讀好書, 入大學。畢業之後搵份好工, 然後儲錢買樓娶老婆」
呢D人生ge 方程式, 由細到大已經俾人灌輸。但當出來社會後, 發現原來現實已經同呢條方程式完全偏離。
人ge 時間已經唔值錢, 世界唔係我地理所當然咁諗「種瓜得瓜」
人會變得非常迷茫。
我將枱頭所有野執好, 無用ge 野我送晒俾附近有用ge 同事。
我離開公司, 我人生除左工作外, 仲有D咩事願意付出時間同努力去換ge 呢?
我諗唔到, 定係我唔想接受殘酷的答案: 「沒有」
我返到屋企樓下, 坐係巴士站旁的椅子, 望住個個人歸心似箭般趕回家, 我好羨慕佢地, 好羨慕佢地有野追逐, 有人等佢地回家。
我今晚有D唔想返屋企, 已經俾正常開飯時間遲左15分鐘。
我知道晚晚家人都強顏歡笑咁等我返黎開飯, 其實佢地都好擔心我身體, 又怕我知道佢地ge 傷心, 扮開朗陪我食飯, 想來真苦了他們。
「咳…..」一陣由旁邊傳入我鼻孔裡的二手煙令我不適。
我望一望左邊, 是一個女仔, 大約17, 18歲, 面上有非常厚的化妝, 穿得很露。
我: 唔該, 可唔可以熄左支煙, 我對二手煙敏感的。
我知道可能換來一陣粗口與毒罵, 但對一個將死的人, 已經沒有分別。
她望一望我, 把香煙弄熄了, 然後繼續等車。
我: 你食煙食左幾耐, 食煙對身體唔好, 你都係快D戒左佢啦。
我居然開始同一個唔識ge 女仔說起教上來
佢冇理我……
我都唔再講野, 然後巴士開, 佢起身上車, 佢行過我身邊時, 望一望我, 我地四目交投左一陣, 她就走了。
作者:
kimwong3252000
時間:
2011-6-19 12:13
朋友篇
我有時覺得, 我真係幾好彩。咁多絕症中, 我起碼係死前知道自己仲有幾耐命, 仲有活動能力做自己想做ge事。
當我知道自己有事之後, 好多個晚上, 我都夢見自己ge 葬禮, 靈堂內一個人都冇, 然後自己嚇醒。
我唔想到時真係咁, 於是我做左個決定。
「我將要去澳洲working holiday, 臨走前可以俾我請你地食餐飯嗎?」
我係fb 舉辦左一個活動, 將所有中學同學, 無論熟或不熟, 有冇聯絡都好, 都add 晒落去。活動中講明, 因為我之前中左幾千蚊6合彩, 呢餐我請。仲歡迎帶同家倦或未有邀請的同學。
其實我冇諗過錢ge 問題, 因為2個月後我都帶唔走, 係我死前, 希望可以見一下佢地, 由細玩到大的朋友。
最後, 就公佈自己的死期, 做一個最後的壓軸驚喜。
當晚, 出現的人大概比我想像中小, 連我在內只有10人(原來唔洗錢都唔一定會黎)
其中一個是我的保險經紀, 只有她知道我身體的事。當然, 我已經叮囑她不要告訴其他人, 因為他們驚訝的一刻, 我想自己一個享受。
席間大家開始話題都係圍繞大家現在的工作, 有的當了警察, 有的做過傳銷, 冇做之後做掙人一身債。
之後講及大家婚姻, 戀愛狀況, 有的已經奉子承婚, 有的仍是單身。不過, 也有些人什麼也不說, 就默默地坐在位上。
對了!!! 我地當晚是吃打邊爐的, 大家說想回味中學時經常一大伙人打邊爐, 任飲任食的歡樂時刻。
其實, 我心裡知道大家是不想我荷包大出血的。
我突然醒起: 你地記唔記得邊個有一次打完邊爐飲醉左, 然後係條街度痾尿?
「邊個, 邊個?」大家不斷回想, 究竟係邊個呢?
「係我。」一隻手突然舉起, 我地難以置信地望向這個沉默寡言, 成晚都冇出過聲的同學, 居然都做過咁瘋狂的事。
我地一齊大笑, 時間, 氣氛好似帶返惜日最開心ge 時代。
大家飲多兩杯, 都已經有D high, 朋友A問我:「死仔, 做咩咁好死請我地食飯呀?」
我: 「都話中左6合彩囉。」
朋友B: 「有錢就留返第時娶老婆用啦, 而家D女仔, 如果你冇錢, 點會嫁俾你丫。」
我: 「你地唔洗同我擔心, 我去到澳洲會搵野做, 搵鬼妹識, 我地同我定wo」
朋友A: 「你地知唔知Amy 最近點?」
Amy 呢個名突然間好似觸動到我條神經咁。
朋友B: 「我聽人講, 有人見到佢係機場做地勤空姐。」
朋友C: 「吓, o個時畢業後佢好似話去外國讀書, 返到黎之後又話好似識到個有錢佬, 之前仲好似話要結婚ga?
朋友B: 「唔知呀, 都冇人同佢仲有聯絡, 佢不嬲都睇唔起班上ge 男仔, 以為自己影過幾張雜誌相就係明星。」
Amy可以話係我地成班男仔ge 女神, 不過佢從來冇人試過溝佢。
除左我(不過冇人知)
到差唔多食完, 按我之前所想, 我會宣佈我將死ge 消息。
不過, 我最後打消左呢個念頭, 無謂因為我一個人, 而影響大家難得相聚ge 一刻快樂丫。靈堂本來就應該放死人, 咁多活人係度哭哭啼啼, 唔通死人可以返生, 家屬會唔傷心咩?
我一路坐車回家, 一路覺得自己好賤格, 就因為一己私慾, 就想所有人都要唔開心。
人都死左, 點解唔可以留返ge 係快樂, 開心ge 記憶呢? 你自己就話死左一了百了jei, 人地仲有大把日子過ga, 何必成為別人心中的陰影, 不如做暗地裡保佑他們的天使吧。
我到左總站, 落左巴士, 見到一個似熟又非熟的女仔, 自己一個座左係巴士站旁的椅子上。
她一邊吸著手上的香煙, 這是令我覺得似曾相識; 但令一方面, 她冇化妝, 衣著非常素, 白T加短褲, 就像她應有年齡的清純。
我走過她旁邊位置坐低, 而她亦立刻熄了香煙。
我: 你等我嗎?
她點了點頭。
我: 有什麼事嗎?
她: o個日, 點解你會叫我唔好食煙?
我聽到之後, 有點啼笑皆非?
我: 這需要理由嗎? 係人都知吸煙危害健康, 邊個都想長命D掛?
她: 咁點解係我?
我想, 呢個問題我更加有資格問吧?
我: 唔好意思, 我唔係好明?
她面有點紅, 提高了聲調說: 「我話點解咁多人食煙, 咁多人死, 你偏偏要同我講丫? 我食左煙咁耐, 屋企人, 同學, 出面D friends, 甚至我D仔, 都冇同我講叫我唔好食, 反而仲買埋俾我食。點解, 你呢個3唔識7 ge 人要黎管我, 要黎扮關心我? 你係咪想溝我, 你係咪想搞我, 你地D男人諗咩我好清楚, 我D男朋友多到我都唔記得咁多, 唔好以為我仲係o個D咩都唔識ge 學生妹先得ga?」
我聽完之後, 靜左一陣, 然後好淡好淡咁望住佢回答。
我ge 回答係: 你今日咁著, 俾第一次見你時順眼好多, 好襯你。
佢聽完呆左, 無諗過我會咁答佢。
我繼續講: 以前我覺得人地對我好, 一定係想係我身上攞著數, 所以會對佢地提高警界。但係慢慢地, 我發現到原來你可以對人好,關心人, 係一種福氣。
個女仔冇出聲, 我: 我以前唔識關心人, 我身邊ge 人一個一個俾我傷害, 然後離開我。到我而家想去愛人, 點知…..點知身邊可以俾我關心ge 人愈黎愈少。所以, 唔知你可唔可以俾我試下去對人好, 留意身邊多D美好ge 事呢?
佢: 美好ge事……..
我: 嗯, 就好似你咁, 值得我去留心, 值得我去關懷ge 人同事。
講完之後, 我就企左係身, 慢慢咁行返屋企。
「你聽晚會唔會再落黎?」佢係後面問我。
「嗯, 聽晚呢個時候吧。」我回答她。
唔知點解, 我當晚心情好好, 個人感覺好平靜。人的生命有限, 但點樣去運用你有限ge生命, 去做咩事, 你同我都係可以選的。
作者:
kimwong3252000
時間:
2011-6-19 12:13
身後事篇
我有一日, 突然間想到一樣野, 就係我死左之後, 葬禮會以咩形式舉行呢?
由於我生前係冇宗教信仰, 以香港一般做法, 冇信仰ge人會撥入道教形式, 即係燒香, 金銀衣紙, 破地獄等等儀式。
我開始有D羨慕有宗教信仰的人, 起碼他們可以有一套儀式同程序跟隨, 死後亦都知道要去天堂定去輪迴投胎丫。
我決定唔得, 我要選擇自己入土為安的方法。
於是我開始上網找一些唔同人ge 「屍體處理方法」
除左土葬火葬外, 更加會有人灑落大海, 成為魚糧。西藏人更加會舉行天葬, 讓禿鷲們將屍體的肉骨全部吃完。
我睇完之後, 都係決定唔到要點做, 概然還在生就先不理會吧。
講返我同抽煙女, 不知不覺, 我同佢已經有2個多星期每晚都會到樓下傾下計。
有時我會帶佢去阿華間糖水鋪坐下。
呀!佢叫Zoe, 係一個中五畢業後冇再讀書ge 女仔, 屋企父母成日出左去開工, 得返佢同細佬兩個人。
我於是提出, 橫掂小唯就黎生得, 出唔到鋪頭幫手, 不如叫Zoe 黎做住part time幫下手先, 一來佢又唔洗冇野做跟埋D朋友去玩, 二來有D寄托可以賺下錢都唔錯丫。
就咁, Zoe就開始係度做野, 我發覺其實佢本性唔壞的, 不過可能自細缺乏父母家人關心, 所以先學壞。自從第二次見面後, 佢已經冇再係我面前食煙。
有時, 因為Zoe 話做左成日野好悶, 我會帶埋notebook去俾佢上下網, 佢都好鐘意上高登, 睇下D ff 故。佢成日話希望自己有個1001 post, 即係一個屬於佢自己ge 1001 post。我叫佢: 你自貼都未必得啦, 寫甜故吧。佢話總會有日, 佢可以成功。
今日, 我同屋企人黎到擺放我外婆外公ge 骨灰地方拜祭。其實係我主動提出想黎掃墓, 因為工作, 拍拖或者等等, 已經好多年冇黎過。
想來我真不孝, 小時侯外公外婆是最庝我的, 但是我居然咁耐冇黎過。
望住佢地張相, 覺得佢地非常幸福, 死後仍可與最愛ge 人一齊。我呢?
我對住佢地個位講: 公公, 婆婆, 對唔住, 咁耐冇黎睇你地。不過你地等多我一陣, 我好快落黎陪你地, 到時就可以等我繼續孝順你地。
其他家人已經係後面哭不成聲。
我: 不過, 我暫時都唔可以落黎, 因為我係呢度仲有好多野未做。我未可以為父母盡孝道, 未還我欠人ge 野, 所以我未可以落黎陪你地, 未可以。
媽呢個時候過黎: 仔, 你唔可以放棄, 你一定可以好返。
我攬實我媽, 兩母子已經哭成淚人, 我開始明白, 原來死去ge 人唔係要叫你幾時要拜佢, 幾時要燒野俾佢。佢地其實係想提醒在世ge人珍惜現在, 用心去愛身邊ge人。
作者:
kimwong3252000
時間:
2011-6-19 12:14
道歉篇
我回想自己一生, 我最內疚同覺得對佢唔住ge 人, 就係我前女友, 阿思。
我同佢相識, 佢係一次朋友聚會, 當時我記得對佢印象唔深, 佢係一個好普通ge女仔, 所以印象真係唔多。
之後, 朋友話俾我知, 佢好似對我有意思, 就幫我地約左出黎食飯。
最後我地一齊左, 但係我都唔知我係咪鍾意過佢。
「你鐘意我D咩?」每次阿思問我呢個問題, 我都覺得好為難。
因為我打從心底唔識答佢。所以佢愈對我好, 我就愈內疚, 因為我知道佢只係我想拍拖而佢又啱啱出現ge 人, 唔係我鐘意, 我愛的人。
但係, 男人總係貪心, 我當然唔會抗拒一個人對自己好, 縱使佢唔係我的最愛。
自私ge 我以為可能相處落去, 我會真心去愛佢, 真心去鍾意佢。
但係, 感情真係冇得呃, 去到拍拖一年後, 我開始厭惡佢ge 關心, 對佢冷淡。
我好記得我講分手個日, 落住大雨, 我最後一次送佢到佢樓下。
「我地分手吧。」講完, 我鬆開左佢隻手。
「係咪我做錯左D乜野, 點解?」佢喊住問我。
「唔係, 你冇做錯, 錯ge係我。」我答。
「咁點解? 點解要分手? 點解要咁對我?」思問。
「因為我唔愛你, 我由此至終都唔鍾意你。」我好大聲咁對住佢咆哮。
我講完就轉身離開, 就算聽到思係後面好大聲咁喊, 我都冇諗過返轉頭。
我當時只覺得將呢個包袱掉低, 係好開心ge 事。
自此之後, 我冇再同思有聯絡, 但係我每當諗返起呢件事我都好後悔。
如果當時我可以處理得好D, 可能思唔洗俾我傷害咁深。
幸好我仲有時間, 我可以補償返我欠阿思ge 野, 我想同佢講一句: 對唔住。
我打探過後, 知道思而家仲係以前拍拖時ge 公司做野。
今日天氣好差, 整個下午都下著雷雨。
係佢公司樓下ge 我, 唔敢有一陣遺漏, 望著阿思的身影。
等左大約30分鐘, 終於見到佢出黎, 佢好似冇帶遮。
於是我攞住遮, 行近佢。
正當我離佢唔夠10米, 一個男人係佢身後出現, 拖住佢, 然後一齊開遮離開。
佢地行向我方向, 我唔知應該點做, 呢個時候我同思四目交投, 我地冇見兩年終於再見面。
我本想主動叫她, 但又覺得佢男友係佢身邊會唔會令佢誤會我地呢。
而思亦冇同我打招呼, 望了我一眼之後就不望我走了。
「對唔住, 阿思。」係佢地行過左我之後我細聲咁同自己講左呢一句。
我想我其實唔應該再黎搵佢, 我一廂情願以為佢會想我道歉。
原來經過咁耐, 我仍然是那麼自私。
作者:
kimwong3252000
時間:
2011-6-19 12:16
惡化篇
我記得見完阿思o個晚, 我一個人係條街度漫無目的咁行, 我一路行, 一路諗返起阿思當時ge眼神, 係徹底冷漠同厭惡。
我知道我唔可以叫每一個人都覺得我係好人, 我亦都冇要求我自己一生冇犯過錯, 但係, 如果而家個天話我可以用剩下來所有時間, 去換取思ge原諒, 我會非常樂意。
我o個晚飲左好多酒, 然後俾雨水係咁淋我, 希望雨水可以洗刷我ge罪。
關於當晚, 我記得ge野唔多, 我只係記得我飲到好夜, 然後一個人好頭痛, 答的士返屋企。
返到樓下, 我好狼狽咁落左的士。然後, 有一個人拎全把遮過黎扶我, 佢係Zoe
Z: 做咩飲到咁醉, 落咁大雨點解唔帶遮?
我: 遮? 哈哈, 我送左俾人Lu
Z: 我扶你去坐低先啦。
我: 點解, 點解你會係度?
Z: 老闆見你今晚冇黎到, 打你手機又唔聽, 所以咪叫我落黎睇下你係唔係度囉。
我: 唔係, 我地今日晏晝見到面, o個時你掂行掂過, 點解你而家又會出現。
Z: 你全身好慶呀, 你發緊高燒。
我: 我冇事, 呀思呀思對唔住呀, 唔好唔理我, 唔好扔低我一個人呀。
然後我攬住左Zoe, 不停同佢講: 唔好走, 我想你聽我講…….
當時我意識好模糊, 發燒加酒精影響之下, 我將Zoe當左呀思。
但係, 酒醉畢竟有三分醒。
當我聽到Zoe講一句說話, 我成個人好似觸電感醒左一醒。
Z: 我鍾意你。
雖然好細聲, 但我聽得好清楚。
我雙手冇放開, 用力將Zoe抱實, 呢一刻我知道我好清醒冇俾酒精影響。
出於身體的坦白, 我唔捨得放手。
但係, 唔夠5秒, 我理智已經佔據返我身體。
我諗起呀思, 諗起今日佢ge眼神, 諗起分手ge情景, 我唔可以再咁自私。
我唔可以再去傷害人, 我ge身體, 我ge病令我知道我冇資格再愛人。
我推開左佢, 我繼續扮醉: 哈哈, 你快D返屋企啦, 好夜啦。
Zoe俾我推開後, 有D尷尬, 然後話: 你自己一個人ok?
我點了點頭, 然後走向商場方向。
我冇再擰返轉頭望Zoe, 因為我怕我自私又令我重滔覆轍。現在的絕情, 可以減小將來的悲痛, 實在太值得了。
「能成為密友大概總帶著愛。」
我帶著疲憊不堪ge身軀, 忍著頭痛和周身骨痛, 終於來到華的鋪頭。
佢而係度拉緊閘, 佢見到我就走過我扶我。
「幫我叫白車。」我暈倒前最後一句講的說話。
作者:
kimwong3252000
時間:
2011-6-19 12:16
留院篇
當我醒返, 我已經瞓左係醫院度。
我見到呀華係我旁邊坐低。
我: 唔該晒你。
華: 兩兄弟講埋D衰野。
我點了點頭: 醫生點講?
華: 佢話你有D肺炎, 發高燒, 同你打左針, 要留院觀察幾日, 做詳細檢查。
我: 我諗我可能入得黎, 出唔……
華: 你唔好講咁多野, 休息下。打左電話俾伯母, 叫佢地唔洗擔心, 聽日先黎睇你。
我: 搞到你咁夜, 唔好意思, 唔知點解, 我臨暈低前都要搵你幫我叫白車, 睇黎我第時做鬼都會返黎搵你。
我地一齊笑, 不過呀華眼好似有淚光, 佢其實真係好眼淺。
我: 呀華, 幫我一個忙, 唔好話俾Zoe聽我個病同我入左醫院。
華: 放心, 我會ga la, 不過你睇唔睇得出佢對你………
我: 如果係, 更加唔可以俾佢知道, 我唔想多一個人為我唔開心。
之後呀華走左, 我成晚係醫院都瞓唔著, 一路回想返思ge眼神, 但係又諗到攬住Zoe的感覺。
我自從知道自己有血癌後, 最開心, 最值得記住ge一刻, 就係當時。
如果我冇病, 我同Zoe究竟有冇可能。我唔敢再想下去, 之後就瞓左。
第二日, 醫生同我講, 我白血球數目偏高, 叫我留院觀察多幾日, 怕肺炎引起其他併發症。
我屋企人每晚都會帶野食黎探我, 然後呀華係晏晝都有抽時間黎睇我。
呀華將一杯中藥放左係床邊: 你ge
我: 咩黎ga, 我好怕苦, 唔飲中藥ga wo
華: 係Zoe個傻妹買俾你, 感冒退燒茶。
我: 你冇話俾佢聽ma?
華: 梗係冇, 我話你病左, 留左係屋企jar。
我: 嗯, 唔該你呀華。
呀華走左之後, 我望住Zoe買俾我杯涼茶。
苦口良藥, 我而家對Zoe做ge野何嘗唔係一樣呢?
作者:
kimwong3252000
時間:
2011-6-19 12:18
病友篇
我估唔到我之前講話我可能唔出到院變成事實。留院已經一整個星期了, 醫生仍然不準許我出院。我被轉到癌症病人的病房內, 方便觀察, 而我非常討厭這裡。
房間內有6個病人, 大多數是老人家。而我旁邊的是一位60多歲的伯伯, 他叫古伯。他每天都有很多家人探他, 包括他媳婦, 孫女和眾多家人。
但是, 當深夜時, 他睡到半夜都會痛苦地呻吟, 有時還會大叫, 但房間內其他人已經習以為常, 沒人理會他。我初時也會被嚇到睡不到, 但慢慢已經習慣了。
我在醫院的日子已經兩星期, 有一天下午, 做完電療的古伯推回床上, 我見他真是面如死灰, 像虛脫了一樣。他休息一會後, 開口向我說話:
「後生仔, 你咩事入黎醫院?」
我: 白血病
古: 哦, 幸好唔係癌症, 可以醫好的。電療真的好像攞我條命一樣。我同你講, 生癌唔辛苦, 醫o個時先慘。
我聽到他這樣說, 只好笑一笑: 係呢, 你咩係癌症?
他: 我生肺癌。五年前已經驗到, o個時做左手術切除左個腫瘤。點知今年初復發, 最後咪又返黎呢到囉。
我聽了他的遭遇, 覺得很可憐, 不禁想起我自己呢?
他自故自繼續講落去: 其實醫生有同我講過我咁大年紀做電療會好辛苦, 但係我話只要有一絲希望, 我都唔會放棄。我仲要睇我D孫小學, 中學, 大學畢業。
佢地已經冇左婆婆, 唔可以冇埋我呢個公公ge。
佢講完之後, 合上雙眼閉目養神。我覺得古伯好勇敢, 從來冇諗過放棄生命。我係佢身上, 睇到活著ge可貴。
隔左一陣, 佢屋企人黎左, 佢孫女, 大約只有小學2年級吧, 把一個橙遞俾我
「哥哥, 請你食丫。」
我: 多謝小妹妹。
我知道除左藥物, 電療, 化療外, 家人ge關心同自己生存落去ge意志更為重要。
我係醫院度識到第一個朋友, 佢就係熱愛生命, 家人ge抗癌鬥士 ─ 古伯。
作者:
kimwong3252000
時間:
2011-6-19 12:19
危急篇
已經兩星期了, 呀華黎探我, 不斷同我講Zoe係咁問我去左邊到。
我知道, 紙始終係包唔住火, 佢遲早都會知道真相。
一個下午, 我拎起個手機, 有一刻衝動想打俾Zoe
古伯: 後生仔, 做咩擰起個電話咁耐又唔打呀? 同女朋友鬧左交呀?
我: 唔係呀, 不過…….我都唔知點講。
古: 女仔呢D野好簡單ge jei, 打過電話去, 講句SORRY, 男人唔好咁小氣, 有時咪就下佢地囉。
我笑左一笑, 如果我好似以前咁, 一早打左去, 因為我都想係生命最後ge階段, 可以有一個我最愛ge人陪我。
我唔想成為任何人的包袱。
不過, 我想我始終都冇古伯咁好彩, 身邊有咁多愛佢ge人。
當晚, 我睡到半夜醒左, 因為我發覺今晚病房有些異乎尋常。
對了! 為什麼今晚會這麼靜?
遭了! 古伯!!!
我趕緊到他床邊, 無論怎拍他, 怎叫他, 他也沒有反應。
我跑到病房外, 向護士站大叫: 醫生, 姑娘救命呀!!!!
所有護士和當值醫生跑到古伯床邊, 醫生檢查過古伯, 然後將他送上深切治療部。
醫生: 盡快通知病人家屬, 情況非常危急。
所有人都被眼前情況驚醒。
生命原來可以咁脆弱, 下午才和我有講有笑的古伯, 而家情況可以咁危急。
我跟著護士們, 一邊左古伯身邊大聲講:
「古伯, 頂住呀, 支持住呀!!! 你仲要睇你孫女畢業架, 唔好放棄呀。」
呢個時候, 一論急救好似令古伯暫時清醒D, 佢向我伸手出黎…….
我捉住佢隻手, 繼續同佢講野: 電療咁辛苦你都可以捱過, 冇野難到你地ga。
唔知點解, 我好似見到古伯係痛苦ge面容上有一絲笑容。
我: 我都未帶我女朋友見你, 佢好靚女ga, 你一定會想見佢。
然後古伯俾推左入lift, 去了深切治療部。
我係呢一刻有咩好做呢? 我咩野都幫唔到手!
我好冇用呀!!!
呢個時候, 我諗到我有咩可以做。
我按lift, 向醫院大堂走。
作者:
kimwong3252000
時間:
2011-6-19 12:19
彩虹篇
我決定要係醫院門口等古伯家人, 我要第一時間帶佢地上去ICU
以古伯而家ge情況, 一秒都唔可以遲。
以前聽人講過, 如果臨死時, 死者等唔到家人全部到齊, 他是會死不暝目的。
我最後可以為古伯做ge事, 就係完成佢心願, 希望佢一路好走。
我坐左係醫院問口旁邊的椅子上, 望一望時鐘, 已經半夜4時多。
我自己一個坐著, 令我想起初次與她相遇, 就也是我自己一個坐在巴士站旁的椅子開始。
當然, 現在沒有了她的二手煙味, 但她的身影好像在我對面的空椅子上出現。
她還有每晚一個人坐在巴士站等我回來嗎?
我拿起手機, 找到她的電話, 正考慮緊打不打呢通電話之際, 古伯的女兒, 女婿和孫女終於到了醫院。
我立刻接過他們, 帶他們走最快的路往ICU
我隔著玻璃, 看到奄奄一息的古伯捉著女兒的手, 雙眼流出眼淚。
而小孫女也攬著外公身體不放, 好像她也意識到之後會和這位最敬愛的外公永別。
最後, 我見到古伯向我這邊望來, 給我一個語重心長的微笑………
他走了, 古伯你先走一步吧。
我之前看過一部電影「天作之盒」, 入面說人死了後會經過一條彩虹橋, 然後會在盡頭處看見過世的親人, 最後和他們一起永遠快快樂樂生活。
古伯, 請你安息吧。
我平復心情後, 已經早上6:30
我臨睡前, 發了一通短訊給Zoe: 我最後的愛人, 我會在彩虹橋的盡頭等你。我愛你。
然後我關上電話, 因為我決定這是我留給她的最後說話。
作者:
kimwong3252000
時間:
2011-6-19 12:21
開始篇
第二日, 由於我好累ge關係, 我瞓到中午先起身, 開返個電話, 呀華ge電話即刻打黎。
呀華: 你同Zoe究竟講過D乜?
我: 發生咩事?
佢今朝一早上左黎我屋企, 然後喊晒問你係邊?
我: 咁你有冇講俾佢知?
華: 我冇講, 不過……..
我: 不過咩…….
華: 小唯佢心軟, 最後講左俾佢知, 佢聽到你係邊間醫院之後即刻趕過黎。
我吸了一口涼氣, 問: 佢走左幾耐?
「大約一個小時前。」華答我。
我同呀華收左線之後, 立刻要求出院, 醫生阻止我, 但我唔理, 只叫了一句:
「如果你地可以醫得好我, 我留低。但係如果唔可以, 我要走。」
我換過衫後, 拿了一些個人物品, 飛奔到了大堂。
我一心只想盡快離開, 因為我唔想俾佢見到我而家個樣, 我唔想佢難過。
但係我去到大堂已經走唔到, 因為Zoe 已經同幾個護士, 保安係登記處大吵大鬧。我只好找個他們看不到的角落躲起來。
其中一個護士: 小姐, 請你唔好係到搞事, 盡快離開。
Z: 我冇搞事, 我要搵人。
護士: 咁佢叫咩名丫? 你又講唔出佢叫咩名, 然後你係每一層病房大呼大叫, 你會攪到其他病人。
Z好激動咁講: 我係唔知佢叫咩名, 我知我咁做係唔啱, 但係…….但係佢就黎死啦。
之後Zoe ge哭聲好似把刀, 一刀一刀咁刺穿我個心。
佢繼續講: 我唔想再浪費一分一秒, 我想陪係佢身邊, 就算係一個星期, 一日都好, 我想見佢。
護士: 小姐, 我都好同情你, 好想幫你, 但係…….
Zoe捉住護士隻手: 求下你, 姑娘, 幫下我, 放我入去搵佢。
我一路以為, 瞞住Zoe係對佢好, 我唔想佢因為我死而傷心。我以為咁樣唔會重滔覆轍。我以為我一個人靜靜咁走, 係可以做到咁瀟灑…….
「我我我我我」……….原來自私ge我從來都冇變過, 睇住眼前呢個女仔喊得如此傷心, 我呢個偽善ge 君子又傷害左一個人。
我決定做返自己 ─自私的賤人。
我一步一步慢慢行出大堂, 我叫了一聲: Zoe
Zoe 望到了我。我們二人就咁樣互相對望。
Zoe好似想行過黎, 我叫住了她: 唔好過黎。
她停了。
我: 我身體會一日一日差, 好快自己已經唔可以照顧自己。我所剩ge時間你同我一齊你會好辛苦。你預備好接受我呢個包袱未?
Zoe: 我只係要一樣野, 你唔好再扔低我。
我地攬左好耐, 好似要完成上一次大雨夜中未完的事。
我和她的故事開始了, 於我生命只剩一個月的時間。
作者:
kimwong3252000
時間:
2011-6-19 12:22
解放篇
三日之後, 醫生批准我出院。
我回到家中之後開始靜心休養。而Zoe亦都陪住係我身邊。
我將佢介紹俾我家人, 而大家相處亦都好不錯。
一日, 我要Zoe陪我去一個地方, 做完一件我唔可以帶落棺材的事。
與當日相同, 思出來了；不同的是, 今天沒有下雨。
我今次主動走上去, 但我不能跑太快, 所以Zoe在旁扶著我。
我主動地叫她: 思。可以傾兩分鐘嗎?
思被我截停, 不得不面對我, 她: 我地之間冇咩野好講。你唔好再煩我。
佢撞開了我, 然後一支箭似的走了。
我想起身追她, 但我竟然站不到起來。
我向正在扶起我的Zoe說: 「幫我追她。」
Zoe 跑向思, 將她拉住: 思, 你聽我地講, 三分鐘……
思撥開Zoe的手: 放手, 你係邊個, 我點解要聽你地講。
Zoe: 因為佢就死, 得返一個月命。
思聽完後靜了下來。
我們三人找了個公園涼亭, Zoe在涼亭外等我們。我和思坐了一會, 我身體已經回神過來。
思: 對不起, 我剛剛不知道輕輕一撞會……
我: 傻啦, 呢一下咪當係我欠你咁多入面還返D利息囉。
思: 不好意思, 上次下雨那天, 沒有應你, 因為我未婚夫在旁, 所以…..
我: 我明白的。你快要結婚了嗎?
思: 對, 三個月後, 到時你同Zoe…..
思知道好像有些不對, 所以停了。
我: 唔緊要, 到時我叫Zoe幫我送份禮俾你地。總之, 恭喜你地。
思: 多謝。你身體究竟咩事, 醫生點講?
我將我患病ge始末重頭講了一篇給她知道。其實她心地非常善良, 佢聽完後喊左出黎。
我試著安慰她: 嗱, 你再喊, 我覺我自己好慘, 咁我又跟住喊, 醫生叫我要保持開朗, 有助病情, 咁而家我喊啦, 實死快幾日。
我之後裝了幾聲喊。
思被我豆得破涕為笑: 你仲咁鐘意講笑。係呢, 你搵我咩事?
我望著她: 我搵你係想同你講句對唔住, 我當日咁樣對你係我唔啱。
她: 傻瓜, 仲將呢D陳年往事記住做乜。
我: 我就係唔想將佢放入棺材, 同我一齊燒成灰燼。你會原諒我嗎。
思: 老實說, 當初我是好憎你的。但發覺人要向前看, 勉強冇幸福。如果唔係你, 我點會遇到我老公, 反過來我真係要多謝你。
我: 咁即點?
思: 好啦, 我原諒你啦。
呢一刻個人真係放鬆晒, 個人輕左好多咁, 我可以放低呢件事, 有好多謝個天俾我有呢個機會面對。
我: 多謝你。咁我可以無憾咁走啦。
思指了一指Zoe, 問我: 她就是你想找的人?
我: 對, 我唔會錯。就算日子剩返幾多都唔重要。因為我地心中擁有對方, 就算我死後都係唔會變。
思點了一下頭: 咁睇黎我都要恭喜你。
作者:
kimwong3252000
時間:
2011-6-19 12:23
愛情篇
就在與思見面後數日, 我身體情況一天比一天差, 我知道自己的大限將至。
所以我希望把所有時間用在身邊的人, 包括家人, 朋友與及愛人。
有一個早上, 我與Zoe翻看我的旅行相薄, 幸好我是一個有習慣把相片沖印出來的人。因為我覺得握在手裡的東西比在電腦看到的真實多了。
當她看到一張相, 好奇地指著問我: 這條橋的夜景好好看, 是那裡拍的?
我看了一看, 回答她: 哦, 這是在台灣旅行時拍的, 在淡水漁人碼頭, 好像叫“情人橋”。
Z: 好浪漫啊。能夠和情人一同走過一定很高興。
我: 我就覺得沒有什麼特別, 只是夜了會有些燈光打在橋上, 然後人家說什麼在橋上看日落是最美的。
Z興奮地說: 嘩, 仲睇到日落, 不如等遲些時間我們一齊去看好嗎?
我: 好, 不過就怕我等不及……..
Z聽到之後, 我們也沉默了一陣子。她眼漲紅了, 然後依偎在我身體上: 不準你這樣說, 我們還有很多日子, 很多地方一起去的。
我: 其實也不用到台灣, 我現在可以立刻帶你去看情人橋。
過了一段時間, 我終於帶她到了香港的情人橋。
我們一起坐在沙灘上, 太陽在我們面前慢慢落下, 面前的橋亮著美麗的燈光, 我肯定絕不比照片上的情人橋差。
我: 你睇, 係咪靚過台灣o個條好多。
Z: 傻瓜, 這條明明是青馬大橋, 都不是情人橋。
我: 哈, 我覺得這裡美太多了。為什麼我們經常羨慕別人的東西, 但往往不留心一下身邊美好的事物。
Zoe不出聲, 我把她抱得更緊, 然後說: 其實只要有心愛的人在身邊, 任何橋都可以係我們的情人橋。所以將來我唔係你身邊, 你都要堅強, 因為我永遠都會守護你。
我感覺到被Zoe所依靠的肩膀有些濕了, 我知道是她的淚水。
Zoe: 你想唔想知道我一個故事?
我: 所有關於你的事, 只要你肯講我都想聽。
Z: 我以前有一個男朋友, 他對我很好, 幫我補習, 教我做返個有用ge人, 係我最迷失ge時候佢救返我。我可以感受到佢真係好愛我。
我冇出聲, 因為Zoe很少向我講她以前的事。
Z: 但係我其實心裡還是愛著我的初戀男友, 不知道是不甘心, 覺得他還是愛我, 我一定可以追他回來。最後…….
我: 最後怎樣。
Z: 最後, 我瞞著他, 找初戀男友。當時他已經有了女朋友, 但我還是選擇當第三者。我記得我向他說分手時, 他難以置信和被出賣的痛苦表情我現在閉起雙眼還是記得。
我: Zoe……
Z: 我係咪好賤格? 但我同初戀男友一齊都很短暫, 大家發現彼此原來已經變得不同了。你知道嗎, 最可笑的事我以為他一定會等我, 我想我始終都有他這個避難所, 有人錫, 有人愛。但係個天係公平的, 冇人注定一定要等某人。
我: 他已經有了別人?
Z: 我不知道, 因為他已經到了外國留學。我連與他說句再見的機會也沒有。你講得啱, 我一路只會追活在過去的人, 卻忽略左身邊美好的事物。
我聽完之後, 對她說: 應承我, 我走了之後, 找他, 向他說一句對不起。然後放過自己, 重新生活。
Zoe: 我唔想離開你, 點解個天要係我手上搶走我心愛ge人, 一次又一次。
我冇辦法回答佢呢個問題。
過了一陣, Zoe起身向我說: 我有些口渴, 去買些水回來, 你在這裡等我。
我望著Zoe背景一步一步遠去, 我知道她現在一定想找個地方大哭一場。
我望著眼前美麗的橋影, 眼皮慢慢合上, 我想, 我真的需要休息一下。
作者:
kimwong3252000
時間:
2011-6-19 12:23
倒數篇
當我再次醒來, 已經在醫院。
我張開眼, 第一時間望到有哭過痕跡的Zoe, 父母及家姐, 還有阿華。
Zoe硬擠出一些笑容: 你太懶瞓啦, 趁我行開就瞓著覺?
我: 你們很齊人, 醫院叫你們來見我最後一面嗎?
呀華: 大吉利是。你真係丫, 仲講笑。
我問Zoe: 醫生點講?
Z: 醫生叫你留院休養, 仲話後日下午想見一見你。
於是我無奈地又接受留院的事實。
第二天, 晚上探病時間, 我私床邊擠滿了人。因為我的可愛保險經紀忍不住, 向我的中學同學說了我的病情, 於是他們一班人來看我。
他們帶了很多水果, 雜誌等給我解悶。
能夠認識他們真好。
我: 對不起, 之前騙你們……..
朋友A: 你有什麼對不起我們? 你上次仲請我地食飯tim。
朋友B: 總之, 你而家乜都唔好理, 專心養病, 好返之後再同我地一齊打邊爐。
我忍著眼淚: 好, 不過唔好再係條街痾尿啦。哈哈。
我地係病房一齊大笑, 為一向寂靜的癌症病房注入生氣。
第三天中午, 思帶了她男友來看我, 還給了我喜帖。
我望著思未婚夫對她關懷備至, 我可以肯定她沒有選錯人。
最後臨別時, 思對我說: 到時記住帶Zoe一起來, 我結婚當天真的很希望得到你們的祝福。
當晚我睡不到, 害怕死亡的心情把我壓得睡不著。我很怕我一睡著就不能再醒過來, 我不想死, 我想活下去。
第二天下午, 我和Zoe及家人來到了醫生的辦公室。
我: 醫生, 我仲有幾耐命。
醫生: 以你而家情況看, 樂觀看最多只有2個月。
我: 2個月嗎…….
醫生: 但如果你接受我的建議, 可能是不只的。
我, Zoe和家人差不多異口同聲向醫生問: 什麼建議?
醫生: 骨髓移植手術。
作者:
kimwong3252000
時間:
2011-6-19 12:24
希望篇
醫生: 病人好好彩, 係大約一星期前俾我地搵到適合佢移植的骨髓。我地會以捐贈者的健康骨髓細胞注入患者的骨髓腔內, 希望這些移植的新骨骨髓細胞可再次自行製造健康的白血球。
我實在高興得哭了起來, 我們大叫了一聲, 然後跳了起來, 轉身攬著Zoe, 媽媽和家姐。終於, 終於在我知道患上白血病之後的第一個好消息。
我有機會唔洗死, 我可以生存落去。
醫生: 但這手術是有風險的。
我突然間又從天堂掉了下來, 問: 什麼風險?
醫生: 平均約50%的患者, 在接受骨髓移植後兩年可以存活下來。大多數是由於新骨髓出現排斥, 出現併發症以至死亡。
我冷靜了下來, 只有一半機會嗎?
醫生: 你可以考慮多數天…….
我拖著Zoe的手, 望著哭成淚人的Zoe, 媽媽, 家姐, 還有強忍眼淚的爸爸和姐夫。
我回頭向醫生說: 我決定了, 我要接受手術。請盡快幫我安排手術。
醫生: 你考慮清楚了嗎?
我: 醫生, 我有好多事等住我去做, 我要睇呀華個仔出世, 我要去思ge婚禮, 我要同我一班朋友再去打邊爐, 我要繼續食呀媽煮ge飯, 我仲要帶Zoe去古伯墓前探佢, 仲有, 我要同Zoe去台灣睇情人橋, 同佢過好多好多日子。
我停了停, 感覺到捉著Zoe的手手背被她一滴一滴的眼淚滴濕。
我繼續說: 太多太多事未做, 就算係得10%, 甚至1%機會都好, 為左佢地, 我都會試。
醫生: 咁好, 我盡快幫你安排。其實醫生或者手術幫到病人有限, 其他的要靠病人的意志和身邊的人的支持。
我帶住難得的笑容離開醫生房, 我望著窗外的景色, 發現生命原來是多麼美好。
作者:
kimwong3252000
時間:
2011-6-19 12:26
回來篇
大家好, 首先自我介紹, 我不是一路以來文中的「我」, 亦即故事的主角。所以我開忠明義已經暗示「我不是樓主」。
那麼我是誰? 我叫啊祥, 是主角的大學同學, 為什麼我會代他出文?
因為一個承諾, 男子漢的承諾。
故事要由2年前一個夜晚說起。我接到他打來的電話, 於是我到醫院看他。
我在病床上見到的他, 我差點認不出, 他以前是胖胖的, 但現在消瘦得……
我鼓起精神, 和他打個招呼: 「Ray, 你點呀?」
Ray: 「不太好, 不好意思, 咁夜叫你黎。」
我: 「你真的不太夠意思, 入醫院咁大件事都唔同我地班同學講。」
R: 「唔好意思, 因為呢幾個月發生左太多事係我身上。對了, 你還有在網上寫東西嗎? 我記得你的小說曾經拿過獎的。」
我面有些紅: 「都已經是中學時代的事, 不要再拿出來說了。」
R: 為什麼不寫下去?
我: 人大了, 要面對現實, 香港寫作是賺不到錢的。二來, 當我踏入社會後, 寫作的動力和靈感愈來愈少, 所以很久沒寫了。
R: 祥, 我有一件事想求你幫手, 唔知你可唔可以應承我呢?
我: 咩事?
Ray從床邊的櫃上, 拿了一個USB 手指給我, 然後說: 裡面有一個故事, 由我知道患病開始的事我都記錄下來。有一個女仔, 我知道佢將來可能會好傷心, 而我已經可能唔再係佢身邊, 我想你幫我將入面ge事整理一下, 然後放上網上, 等佢第日冇左我之後, 都可以睇返我地一起過我點點滴滴。
我: Ray, 有乜野要講, 等你好返之後自己同佢講……..
Ray突然用力捉著我的手: 我聽日就要做手術啦, 我唔知聽日之後會係點。醫生話我得一半機會復原……..
接下來係一陣沉默, 激動得滿面通紅的他繼續: 你知唔知道, 自從一個星期前我知道要動手術後, 我每晚都趁她走了之後偷偷地寫我們的經歷, 因為我怕我冇時間呀! 我怕我一合埋眼就永遠醒唔到, 我怕我瞓醒之後會唔記得任何一個值得紀念的時刻。
我淚水已經忍不住, 流到整面都是。
R: 祥, 幫我一次。呢度入面係我生存過ge證據, 係我的所有。記唔記得我地以前係大學宿舍, 成日一齊飲酒傾天光, 你記唔記得我地成日講ge理想?
我: 記得, 「改變社會上的不公平, 令世界變得更美好。」
R: 對, 祥, 我冇時間去實現呢個夢。但係你可以, 我唔係自大到希望可以改變所有人, 我只係想令一個我愛的人可以以後繼續堅強, 樂觀, 勇敢地生存下去。
我: 好, 我盡力而為。但係我有一個條件。
R: 咩條件?
我: 只要你一日在生, 我都唔會幫你寫呢個故事。所以你要
堅強咁生存落去, 提醒我應承過你的事。
Ray 最後露出的笑容, 彷彿帶返去我地以前最開心, 同時亦最荒唐的大學生活。
我一回到家中, 立刻打開USB內的文件, 我看完了之後, 也不禁為之感動。
我心裡有一個使命, 於是我開始修飾他的文章, 將它更完美表現出來。
但我更希望的是, 這個故事永遠都冇機會面世。
直到兩年後一個電話。
作者:
kimwong3252000
時間:
2011-6-19 12:26
再見, 我們的朋友篇
紅墈這個地方對於我其實是不太有好感。因為來的時候, 多數是帶著傷感和離愁別緒的。
我來到了靈堂, 由於時間尚早的關係, 人不是太多。我見到一個女孩, 獨自站在靈堂的中央, 呆呆的望著Ray的照片。照片中的他很精神, 我想他會很滿意這幅照片。
我走到她身旁, 問: 請問你是Zoe嗎?
Z: 對, 你是呀祥?
我點了點頭說: 是你在電話中通知我的。對吧?
Z: 對。
我: 我是不是來的不對時間?
Z: 噢, 不是, Ray 的家人去吃中午先, 我想陪他多一會。儀式大概1個小時後開始, 由於他沒有宗教, 所以一會追悼會會請他生前的朋友說一說他的點滴, 任何想講也可以, 這也是他生前的願望, 之後就會直接上火化場。
我: 我現在可以看一看他嗎?
Z: 當然可以, 我帶你去。
我跟著Zoe走到內堂的小房間內, Ray的身體安祥的躺在那裡。
我隔著玻璃, 默默的望著他, 而身邊的Zoe卻比我想得平靜多。
看來經過這兩年她是成長了。
我: 他去的時候很瘦是吧?
Z: 對。
我: 辛苦嗎?
Z: 不。很安祥, 沒受什麼苦。
我: 不好意思, 其實我知道一些你們的事。
於是我將Ray托我完成的事告訴了Zoe。
我: 其實我一收到你的電話, 第二天我已經開始著手post了。
Zoe笑了一笑: 他真傻, 還是當我小孩, 都不知道我已經學會自己照顧自己。
我: 他總是先想別人再想自己。
Zoe: 其實你post 的故事我看到了, 但是我想問為什麼沒有結局?
我: Ray 沒有給我結局, 我不知道應該怎麼辦?
Z: 不, Ray雖然已經唔係度, 但是不代表他的故事已經完結。
我咀嚼完Zoe 的說話, 與他一起離開。
追悼會開始了, 第一個發言的是Zoe
Zoe: 很多謝各位出席我們的朋友Ray的追悼送別會。他是一個好人, 是一個影響我一生, 我深愛的人。由他離開我們到而家, 我都好掛念他, 不過無論我點樣唔捨得他, 他始終都走了。
Zoe停了一停, 吸了一口氣, 繼續道: 雖然他走了, 但我與他經歷的一切我永遠不會忘記。兩年前當他病情好轉的時候, 之後我們一起去台灣, 一起去思的婚禮, 一起去拜古伯, 一起完成我們想做的事。我們心底裡知道, 每一天都是我們賺來的, 所以用有限時間去做最有意義的事就是我們一起的目的。
Ray的家人, 朋友很多都忍唔住哭了起來。
Z: 最後, 我要多謝佢, 多謝佢一路以來照顧我。但係你而家可以放心, 我已經長大, 我會愛惜自己, 仲會代你照顧你家人, 我要好似你咁學識關心人, 愛護身邊的人。
Zoe終於忍唔住, 眼淚缺堤般流出來。我走上前, 遞出一張紙巾給她, 搭了她一下肩膀: 加油, 堅強說下去。
Zoe: 我係佢身上, 明白生命的可貴。而他熱愛生命, 照亮他人的精神更加是我們的榜樣。Ray他………他不會再痛苦了, 他可以放下所有重擔。他曾經對我說過會在彩虹橋的盡頭等我。但我希望我們重遇的時間是很久很久的將來, 因為我要好似你咁努力活著, 過每一天都是有意義的。
我想在場每位都被Zoe的說話所感動, 回想返Ray由患病到離開, 他勇於認錯, 坦承道歉, 我想很多人也不能好像他這麼坦蕩蕩地走吧。
作者:
kimwong3252000
時間:
2011-6-19 12:28
完結/開始 篇
當ray 的棺木推到靈堂出面, 各人開始排隊圍著棺木走了一圈澹養遺容。我走到看見ray時, 說真正不想看太久, 怕這一眼會深刻在腦海中。
之後, 大家隨旅遊巴到了心葬場, ray 的棺木放了在輸送帶上, 只待家屬按下牆上的按鈕便可以進行火化。亦即是永別的意思。
在場的工作人員及堂官宣佈可以按掣了, 但ray的親友太激動和傷心, 沒有人去按這掣。過了大約15分鐘, 在場的工作人員及堂官開始面露不閱的神色, 也對的, 火葬場的時間是很緊張的, 延誤是會阻礙下一家人的。
堂官再次催促ray的家人要按下去, Zoe這個時候居然十分冷靜, 在ray媽媽耳邊說了幾句, 然後拖著ray媽的手, 一同送他最後一程。
「ray 快D去投胎, 下世你要再做啊媽個仔, 啊媽會再照顧你, 來生再做一家人…..嗚嗚」ray媽媽的哭叫令全場人都動容, 連我已經乾了的眼淚再隨隨落下。
Ray的靈柩慢慢, 慢慢進入牆上的大洞內, 直至再也看不見。
一切應該完了, 煙消雲散。
親友乘坐來的旅遊巴送回山腳, 但我卻不隨車, 選擇了自己慢慢走下山。
在這充滿樹蔭的山路上, 我將今日, 和之前ray的故事的畫面回想一次。
我實在需要時間消化及接受現實。
我走到一半的時候, 居然見到zoe 一個人走在前面, 呆呆的站在路傍。
我走過去叫了她一聲問: Zoe, 你不是跟車走了嗎? 為什麼還在這?
Zoe背對著我, 沒有回頭: 冇, 我同司機講我漏左野, 叫佢放低我等我返去攞。
我: 你漏左野咩? 我陪你行返去搵丫。
Z: 祥呀, 我求先表現的好唔好?
我: 好好呀。
Z: 咁就好啦, 冇人睇得出, 相信ray 都會信我而家好堅強, 唔會要佢擔心吧。
我見到佢不停用手去拭眼淚, 我知道佢忍得好辛苦。
我走過去, 搭著她膊頭: 唔好忍啦, 呀ray已經走左, 想喊就盡情喊出黎啦。
Zoe 真係聽我講, 開始大喊, 佢喊聲比剛才在靈堂內所有人的喊聲總和還要利害。壓力是需要及時發泄出來的。
Zoe 坐在路邊, 我坐在她傍邊, 陪著她。
我可以做的只是那麼多, 因為這是Zoe 和 ray 的故事, 我始終都唔係主角。
所以我望著傍邊這個女孩, 我要照顧佢。
呢個故事就係我陪住Zoe 係路邊喊完結。
我決定要寫我自己ge故事。
巴打們, 你們會支持我嗎?
-當生命只剩三個月-
-全卷完-
作者:
tgvb1029
時間:
2011-6-19 14:34
好 感到 如果系我我會系到等死...
歡迎光臨 機動同盟 Gundam HK (http://gundamhk.com/)
Powered by Discuz! 5.0.0
